الشجرة الملعونة-قصيدة عامية

الشجرة الملعونة
******
شجرة غريبة .. حالفة غير الشوك ما تطرح .
بعــد مــا كنــا .. ف ضلهــــا نلعــب ونفــرح .
قالو عليها شجرة ملعونة ..
قالوا انها بالجن مسكونة ..
خافوا منها .. بعدوا عنها ..
ومـا حـدش فكــر يسألها ..
إيه اللى بدل طرحها .. بشوك بيجرح .
*************************
جريت عليها .. ســــألتـــــها :
فين خيرك .. وفين طرحك ؟!.
والا صحيح زى ما قالوا ..
الجـــــن ســـــــاكــنــك ؟!!
بكت وقالت :
انت كمان هتقول ان الجن ساكنِّى ؟!
دى الحكــــاية ..
أكــــبر مــــنك .. وأكــبر مــنــى .
لو تعرفها ..
عمرك يوم ما هتيجى تلومنى .
قلت لها : احكى .. عرفينى .
قولى السبب .. فهمينى .
وانا هفضل دايمًا حافظ سرك .
****************************
مالت علىَّ وقالت :
كل اللى خافوا منى .. هم اللى علمونى .
أجرح بشوكى .. وبقسوتهم سقونى .
من خيرى أكلوا ..
ونكروا ما شكروا .
ضللت عليهم ياما ..
ونسيوا ما افتكروا .
أول ما كان ييجى الخريف .. ويفضى أغصانى .
ما القـاش غير ضلى معـــايا .. والكل ينسانى .
طرحت شوك .. قلت يمكن يسألونى عن السبب .
بس النتيجة .. كانت أعجب م العجب .
بدال ما ييجوا يفهموا .. ويتعلموا ..
بعــدوا عـنـى .. هــربـــوا وفاتونى .
وقالوا دى شجرة ملعونة .
بالجن مسكونة .
قلت اطرح شوك ..
يمكن يحسوا بقيمتى ..
ويندموا على انهم .. يوم ضيعونى .
*********************